მარკუს მეტრეველი: "ნინი შერმადინთან რომანი ბოროტმა ხალხმა ჩაშალა"
მომღერალ მარკუს მეტრეველს აღარც ნიანგის ტყავის ფეხსაცმელები აცვია და ვერც საოცნებო "ჰამერის" საჭეს მიუჯდა, მაგრამ საბერძნეთიდან საქართველოში დაბრუნებას მაინც არ ნანობს. ურჩევნია, ახალგაზრდობის წლები სამშობლოში გაატაროს. ამ ეტაპზე ის საბერძნეთში გაკეთებული დანაზოგით ცხოვრობს, უახლოეს მომავალში კი ჯიბის შესავსებად შეიძლება ისევ წავიდეს საზღვარგარეთ, ოღონდ ცოტა ხნით.
მის შემოქმედებაში სტაბილურობაა, მონაწილეობს კონცერტებში, წერს ახალ სიმღერებს და ალბომს, პირად ცხოვრებაში კი ისევ ქაოსი და გაურკვევლობა აქვს. ყოფილ ცოლთან ურთიერთობის დალაგება ვერ შეძლო, შვილებს ვერ ნახულობს. ამის გამო შეიძლება უახლოეს მომავალში სასამართლოსაც მიმართოს.
– მარკუს, კარგა ხანია, არსად გამოჩენილხართ. მოგვიყევით, რას აკეთებთ, რა გეგმები გაქვთ.
– პირველ ქართულენოვან ალბომს ვამთავრებ, მხოლოდ ერთი სიმღერა დამრჩა ჩასაწერი. ახლა ალბომის გარე და შიდა ყდისთვის ფოტოებს ვიღებთ. ბოლო სიმღერა ძალიან ცნობილმა კვიპროსელმა კომპოზიტორმა დამიწერა, რომელიც "ევროვიზიისთვისაც" მუშაობს. ის თავად დამიკავშირდა. თურმე ჩემს სიმღერებს მოუსმინა და "ფეისბუქზე" მომწერა, რომ გვეთანამშრომლა. ივლისის შუა რიცხვებში კვიპროსში ჩასვლას ვგეგმავ.
– საბერძნეთიდან დაბრუნების შემდეგ საკმაოდ პოპულარული იყავით, მერე კი თქვენმა რეიტინგმა იკლო. როგორ ფიქრობთ, ასე რატომ მოხდა?
– საქართველოში დიდი გეგმებით ჩამოვედი, მაგრამ, როცა ქვეყანაში სტაბილური სიტუაცია არ არის, დაზღვეული არაფრისგან ხარ. თუნდაც ხელისუფლების ცვლილება გიშლის ხელს, იმ სტრატეგიას მიჰყვე, რაც თავიდან გქონდა ჩაფიქრებული.
– ხელისუფლების ცვლილება დემოკრატიული სახელმწიფოსთვის ბუნებრივი მოვლენაა. შემოქმედს რატომ უნდა შეეშალოს ხელი?
– იმიტომ, რომ საქართველოში შოუბიზნესი პოლიტიკაზეა მიბმული. როცა ხელისუფლება იცვლება, ამ სფეროსაც ეტყობა. მერე თავიდან გიწევს ახალი ადამიანების გაცნობა, გზების გაკვალვა და ა.შ. ვფიქრობ, რომ მივიწყებული სახე მაინც არ ვარ. წინ ნორმალურ ტემპში მივდივარ იმ ფონზე, რაც საქართველოში ხდება.
– მთავრობის ცვლილება თქვენ რა მხრივ შეგეხოთ, შევიწროება იგრძენით?
– ნებისმიერ პოლიტიკურ მიმართულებას მივესალმები, თუ იმ ძალას საქართველოსთვის კარგი უნდა. შესაბამისად სულ ერთია ჩემთვის, ხელისუფლებაში ვინ იქნება, ბატონი ბიძინა თუ ბატონი მიშა. რომელსაც სურს საქართველოს წინსვლა, იმის გვერდით დავდგები. ორივე პოლიტიკოსს დიდ პატივს ვცემ. დაბლოკვა და მსგავსი რამ მე არ შემხებია.
– რა მოლოდინები გქონდათ საქართველოში ჩამოსვლის შემდეგ?
– ზუსტად მაშინ, როცა საქართველოში წამოსვლას ვაპირებდი, "იქს ფაქტორის" კასტინგზე ნინი შერმადინი გავიცანი. მან მითხრა, საქართველოში არ წახვიდე, თორემ ინანებო. მაინც გავრისკე. თან პრეზიდენტი მოგვიწოდებდა, ემიგრანტი ქართველები სამშობლოში დაბრუნდითო. მეც ჩამოვედი, მაგრამ ის ვერ მივიღე, რასაც ველოდი. მეგონა, შოუბიზნესი გამართული და აყვავებული დამხვდებოდა და კორუმპირებული არ იქნებოდა...
– რას გულისხმობთ კორუმპირებულ შოუბიზნესში?
– ზოგიერთი მომღერალი სახელმწიფო სტრუქტურებთანაა ახლოს, ზოგიერთი კი ჩარეცხილი და დაბლოკილია.
– საბერძნეთში შოუბიზნესი შორს დგას პოლიტიკისგან?
– ევროპაში მომღერალი იმ პოლიტიკოსის გვერდით დგება, ვინც მეტს გადაუხდის, მაგრამ ეს სამუდამო არაა. იგივე მომღერალი მეორე წელს კონკურენტი პოლიტიკოსის გვერდით შეიძლება ვნახოთ. შოუბიზნესი ერთ პოლიტიკურ ძალაზე მიჯაჭვული არ არის.
– საქართველოში თქვენი დაბრუნებისთანავე ბევრი ჭორ–მართალი გავრცელდა, თქვენს სექსუალურ ორიენტაციაზე კი ლაპარაკობდნენ.
– ჩემს ორიენტაციაზე რომ არ ისაუბრონ, კიდეც გამიკვირდება... (იცინის). ეს ჭორი იმდენად შევისისხლხორცე, თვითონ ვამბობ, სექსუალურ ორიენტაციაზე რამე მკითხეთ–მეთქი. ასეთ ლაპარაკს ველოდი. სანამ საბერძნეთში წავიდოდი, მაშინაც ვიქცევდი ყურადღებას. ჩემმა პირველმა სიმღერამ "თავისუფლება" და კლიპმა, რომელიც სერგი გვარჯალაძემ გადაცემა "კომუნიკატორში" გაუშვა, დიდი აჟიოტაჟი გამოიწვია და ორ დღეში ცენზურის ქვეშ მოექცა. ეს სიმღერა სიყვარულის, ურთიერთობის, გემოვნების და ა.შ. თავისუფლებაზე იყო აგებული. მაშინ 19 წლის ვიყავი. ვიფიქრე, რომ საქართველოში ჩემი ადგილი არ იყო... ამიტომ საბერძნეთიდან დაბრუნებულს არც გამკვირვებია, ჭორების ობიექტი რომ გავხდი.
მომღერალი მაყურებლის წინაშე განსხვავებული ვიზუალით უნდა წარდგეს, მარტო ვოკალური მხარე არაფერია. ახლა გამოსწორდა ქართულ ესტრადაზე მდგომარეობა, თორემ ადრე ყურადღებას არ აქცევდნენ, სცენაზე როგორ იდგნენ. მომღერალს ღიპი არ უნდა ჰქონდეს!
– რა დაგხვდათ ქართულ ესტრადაზე, როგორ შეაფასებთ თქვენს კოლეგებს?
– კარგი ახალი თაობა დამხვდა, მაგრამ ამავდროულად არიან დაუბანელი, ძონძებით შემოსილი სახეები. ზოგიერთმა არ იცის, სცენაზე როგორ უნდა ავიდეს. უბრალოდ წარმატებულად ყროყინებენ. თუ გვინდა, ევროპელები ვიყოთ, უნდა ვიცოდეთ სცენაზე დგომა. პატივი უნდა ვცეთ მსმენელს და მაყურებელს. ეს შენიშვნა, რა თქმა უნდა, ყველას არ ეკუთვნის. ბოლო პერიოდში, ამ მხრივ, სასიკეთო ძვრები ჩანს.
– კოლეგებზე ასე განაწყენებული იმიტომ ხომ არ ლაპარაკობთ, რომ ცუდად შეგხვდნენ?
– რამდენიმე ცნობილი სახე კრიტიკულად და სკეპტიკურად შემხვდა, მლანძღავდნენ. ცოტა ხანში ეს სიტუაცია დათბა და ახლა თითქმის ყველასთან ვმეგობრობ. პრინციპში, ყველგან ასე ხდება. როცა ახალი სახე შედის შოუბიზნესში, უნდობლად უყურებენ. მაგრამ საქართველოში ცუდი ის არის, რომ თვითონ არაფერს წარმოადგენენ და შენ გაკრიტიკებენ. ჯერ საკუთარ თავს მიხედონ! ამბობდნენ, რომ გოიმი, მახინჯი, გაუნათლებელი ვიყავი და ხმა არ მქონდა. ყველანაირ საზიზღრობას მაბრალებდნენ.
– იმ ადამიანებთან დღეს კარგი ურთიერთობა გაქვთ?
– ახლა მათთვის გავხდი ძალიან ნიჭიერი, გემოვნებიანი, თბილი ადამიანი და ა.შ.
– ნინი შერმადინზე მინდა გკითხოთ. იქნებ გარკვევით, ინტრიგის ჩაგდების გარეშე გვითხრათ, იყო თუ არა თქვენ შორის რომანი.
– მე ვამბობ იმას, რომ ნინი იყო ის ადამიანი, რომელმაც ჩემს გულში რაღაც გრძნობები გააღვიძა. ჩვენი ურთიერთობა არ განვითარდა ბოროტი ადამიანების გამო, რომელთაც ყველაფერი გააკეთეს, რომ ურთიერთობა გაგვფუჭებოდა.
– დღეს აღარ გაქვთ ურთიერთობა?
– ვმეგობრობთ, მაგრამ არა ისე, როგორც თავიდან. ნინი ძალიან მიყვარს და ვგულშემატკივრობ.
– ახლა ვინმეზე შეყვარებული არ ხართ?
– მე საერთოდ სიყვარულით ვიკვებები. ამ ეტაპზე ჩემ გვერდით ძალიან კარგი ადამიანი დგას, თითქმის ჩემი ასაკის არის. ჯერ მეტის თქმა არ მინდა.
– გულწრფელად გვითხარით, ინანეთ საქართველოში დაბრუნება?
– მარტო იმას ვნანობ, რომ წლები მიდის და აქ დიდი არაფერი ხდება. ჩემი ოცნება სამშობლოში დაბრუნება და ახალგაზრდობის აქ გატარება იყო.
– საქართველოში რითი ირჩენთ თავს?
– წელს უამრავ კონცერტში მივიღე მონაწილეობა, მაგრამ ყველა საქველმოქმედო იყო. აქ შემოსავალი მაშინ გაქვს, თუ რესტორანში მღერი. სამი რესტორნისგან მქონდა შემოთავაზება და უარი ვთქვი, რადგან ასეთ ადგილებში სიმღერა არ შემიძლია. არანაირი ბიზნესი არ მაქვს. იმ დანაზოგს ვხარჯავ, რაც მქონდა, მაგრამ ეს ოდესმე ამოიწურება. მანქანის დაბურული მინების გამო იმდენი ჯარიმა გადავიხადე, რომ, მგონი, ფული აღარც დამრჩა.
– "ჰამერის" ყიდვას რომ აპირებდით, გადაიფიქრეთ?
– არც ჩემი ახლანდელი მანქანა "იქს 5" ღირს იაფი. მას ვყიდი, ვაპირებ, ცოტა დავამატო, რომ "ჰამერი" ან სხვა ვიყიდო.
– საქართველოში ჩამოსვლით ბევრ რამეზე მოგიწიათ უარის თქმა?
– კი, დიდ ჰონორარებზე. ვერ ვამდიდრებ ჩემს შემოქმედებას, ვეღარ მივდივარ დასასვენებლად ნებისმიერ ადგილას. ადრე თუ ნიანგის ტყავის ფეხსაცმელში 6.000 ევროს ვიხდიდი, ახლა ამას ვეღარ ვახერხებ. მიყვარდა მეგობრებისთვის ძვირადღირებული საჩუქრების გაკეთება. იქ აპარტამენტებში ვცხოვრობდი, მაგრამ სულ საქართველო მენატრებოდა. ამიტომ არ ვნანობ, რომ აქ ჩამოვედი. ახლა როგორც ვარ, ამითიც ძალიან ბედნიერი გახლავართ.
– ყოფილ ცოლთან დაძაბული ურთიერთობა გქონდათ. მოაგვარეთ ეს პრობლემა?
– ის კვლავ არ მაჩვენებს ჩემს შვილებს. არ მინდოდა, სასამართლოსთვის მიმემართა, მაგრამ, მგონი, იძულებული ვიქნები, კარგი ადვოკატი ავიყვანო და ჩემი უფლებები დავიცვა.
მანანა ნოდია
